خُداوند یسوع مسیح خُدا کے اکلوتے بیٹے ہیں جو آسمان سے زمین پر آئے تاکہ بنی نوع انسان کو گناہ سے نجات دیں۔ وہ کنواری مریم سے پیدا ہوئے، صلیب پر ہمارے گناہوں کا کفارہ دیا، تیسرے دن مُردوں میں سے جی اُٹھے اور آسمان پر اُٹھائے گئے۔

نجات خُداوند یسوع مسیح پر ایمان لانے سے حاصل ہوتی ہے۔ بائبل فرماتی ہے کہ فضل ہی سے ایمان کے وسیلے سے نجات ملتی ہے — یہ خُدا کا انعام ہے، اعمال سے نہیں۔ جو کوئی یسوع مسیح کو اپنا خُداوند اور نجات دہندہ مانتا ہے وہ بچایا جاتا ہے۔

کلامِ مُقدّس خُدا کا الہامی کلام ہے جو روح القدس کی ہدایت سے لکھا گیا۔ یہ پُرانے عہد نامے (۳۹ کتب) اور نئے عہد نامے (۲۷ کتب) پر مشتمل ہے۔ یہ خُدا کی مرضی، نجات کا منصوبہ اور مسیحی زندگی کے لیے رہنمائی فراہم کرتی ہے۔

خُداوند یسوع مسیح نے صلیب پر اپنی جان قُربان کی تاکہ ہمارے گناہوں کا کفارہ دیں۔ خُدا نے اپنے بیٹے کو بھیجا تاکہ ہر وہ شخص جو اُس پر ایمان لائے ہلاک نہ ہو بلکہ ہمیشہ کی زندگی پائے۔ صلیب خُدا کی محبت کا سب سے بڑا اظہار ہے۔